Fundur með fulltrúum Ex Libris

Í síðustu viku héldu fulltrúar Landskerfis bókasafna fund með fulltrúum Ex Libris og tveimur af starfsmönnum Landsbókasafnsins til að gera áætlun um hvernig megi lagfæra "skemmd gögn" í Gegni. Skemmdirnar felast aðallega í því að punktur birtist stundum og stundum ekki á eftir skammstöfun millinafns (t.d. ýmist Ármann Kr Einarsson eða Ármann Kr. Einarsson). Liggur nú fyrir áætlun um hvernig megi lagfæra þetta og um hvernig megi koma nafnmyndaskrá í notkun, en gera má ráð fyrir að nokkra mánuði taki að koma hvoru tveggja í lag.

Á öðrum fundi var farið yfir hvernig ljúka megi samruna gagna úr Gegni og Feng og gerð áætlun um það, og er stefnt að því að ljúka því verki í september 2004.

Loks var fjallað um það hvernig önnur söfn geti tekið kerfið í notkun. Fyrir liggur að bókfræðigögn verða flutt úr Metrabók, en allar horfur eru á að flest þeirra safna sem nú nota önnur kerfi muni tengja eintök í stað þess að flytja gögn og eru mörg hver byrjuð á því.