Sýningar í Sarpi

Vala Gunnarsdóttir fagstjóri Sarps flutti á dögunum erindi á farskóla safnamanna sem var að þessu sinni haldinn á Siglufirði. Erindið kallaðist Breiðari markhópur – sýningar í Sarpi og fjallaði um miðlunarmöguleika aðildasafnanna á sarpur.is

 

Sarpur.is var opnaður almenningi árið 2013 og hlaut ári síðar íslensku safnaverðlaunin. Í umsögn valnefndarinnar um íslensku safnaverðlaunin var meðal annars talað um að vefurinn væri „bylting í aðgengi almennings að upplýsingum um menningararfinn“. Á vefnum er leitarvél sem er mikið notuð en þó eru ekki allir sem heimsækja vefinn með ákveðið efni í huga til að leita eftir og vilja aðeins forvitnast um hvað er til á íslenskum söfnum. Þá geta söfnin stofnað svokallaðar vefsýningar og gert safnkostinn þannig enn sýnilegri almenningi. Með þessu móti er einnig hægt að ná til breiðari markhóps en til að mynda eru ekki allir sem geta heimsótt söfnin, þá er einnig hægt að ná til fólks með því að deila sýningunum á samfélagsmiðla safnanna og ná þá jafnvel einnig til yngra fólks. Að auki væri hægt að setja upp vefsýningu með gripum sem eru of viðkvæmir til þess að vera til sýnis á safni eða gera sýningu sem styður við kennsluskrá skólanna svo dæmi séu tekin. Svokallaðar greiningarsýningar eru mjög sniðugar en með þeim er leitast eftir aðstoð frá almenningi í landinu til að afla upplýsinga um viðfangsefni sýningarinnar, t.d. tökustað ljósmynda. Slík heimildaöflun gefur gripunum mun meira vægi og er mikilvægt að nota tækifærið og afla slíkra upplýsinga áður en þær glatast úr manna minnum.